جيفارا عاش

مين اللي قال النجم مات؟!

أقطع دراعي من هنا

إن الكلام ده شائعات

وازاي يموت على أرضنا

نجم السما والأغنيات؟!

* * *

النجم عايش لم يموت

حتى اسألوا حضن البيوت

حتى اسألوا شوك الحروف

اللي طعن حلق الطاغوت

* * *

النجم دمه ف دمنا

عايش في طينة أرضنا ..

طيبته ف ملامح شعبنا ..
النيل يفيض على شط فكره
يطرح غناوي ف قلبنا

* * *

أحمد فؤاد يا نجمنا

لما السما تحجب نجومها عننا

ديك الأمل اللي صدح

من قبل طلعة فجرنا

يا صوت ضميرنا ف سجننا

آهة ألمنا وقهرنا

أنّة بُكانا ف جرحنا

زغروطة تملا فرحنا

صرخة غضب في وجه من يغدر بنا

حاجة ف ضميرنا كلنا

بحلونا .. بمرنا

بحبنا .. بكرهنا

بطهرنا ووحلنا

بكل حته مننا

يا كل حته منّنا

* * *

مين اللي قال النجم مات؟!

هي النجوم تعرف كفن؟!
النجم لم يِبرح سماه

النجم شِعر .. النجم فن

مين اللي قال جيفارا مات؟!

جيفارا عايش لم يموت

جيفارا عاش غنوة وطن

والغنوة .. لا يمكن تموت

ظهر الثلاثاء

3/12/2013

29/1/1435